2010年8月2日星期一

《潛行凶間》- 夢裏夢外


          夢境是最老實的傢伙,因為它能反映人的潛意識,暴露出一些就連自己也沒意識到的內心秘密。而《潛行凶間》中的Cobb(里安納度狄卡比奧 飾)就是利用這種特質,通過夢境,進入別人的潛意識,偷取牢牢鎖在潛意識保險箱內的隱私。
         
          既然能夠竊取,也就應該可以植入意念,電影便圍繞着Cobb跟隊友們如何建蓋多層的夢中夢,從而在目標人物的潛意識深處植入一些意念,讓它萌芽,繼而發展成自己的理念。
         
          電影的題材無疑新穎絕倫,畫面構圖匠心獨運,時而地動山搖,時而排山倒海,有時幾個空間又平行發展,讓人目不暇給。在多層次有深度的夢境裏,觀眾彷彿也成了入侵者,隨着角色們的步伐,經歷了一次驚險之旅,然後一層又一層的探進別人的潛藏深處,偷窺當中的秘密。
         
          電影完場時,觀眾猶如從夢中甦醒過來一樣,且慢,還是這才從現實中進入夢境去呢 ? 霎時間也分不清楚究竟當下是夢裏還是夢外了。
         
          浮生若夢或許是電影想帶出的其中主題。在現實生活中,我們常用這話來勸導人們別對得失看得重,因為這一切都只不過是南柯一夢。
         
          毋須執着,因為人生是一場夢,這想法未免太讓人灰心了。或許我們該取其中庸之道,當稱心如意的時候就是活在現實裏,當失落挫敗時則是置身噩夢中,且很快會夢醒。這樣變相地遊走於夢裏夢外,假如沒有因此而被弄至瘋癲的話,相信人生會是蠻開心的。


(刊於《頭條日報》的《光影塵尖》專欄)


潛行凶間》(Inception)預告片 :

18 則留言:

beetlejuice 說...

真係好有趣,好好睇!

不過睇完發覺自己對劇中人的名字都很模糊,只是記得聽到其他角色叫喚男主角的時候就像唸:Dump (Dom), 喚他老婆就是:Mo。

所以我就是不停的聽到Dump and Mo
哈哈哈哈。。。

說...

beetlejuice : 係喎, 我應該寫番戲裡面個名既叫法先啱, 我第時要小心d先得.

我都覺得好好睇, 亦打算再睇多次, 因為有d細節我想搞清楚d, 例如
1. 在戲裡面入人地個夢果個技術係乜啦;
2. 佢話第一個夢既五分鐘等如第二個夢既幾多分鐘,然後又等如第三個夢既幾分鐘呢;
3. 最後dom係點救番個日本人啦, 諸如此類.

不過我就覺得有樣野唔係好講得通. 第一個夢同第二個夢分別係那司機(我唔記得佢叫咩名)和arthur的夢境, 但每個人都有各自的潛意識, 所以是沒可能如電影中講得咁簡單.

^
|
|
|

幾衰, 我係度駁故啝.(哈哈)

beetlejuice 說...

哈哈哈駁故係咪作家0既特質黎架??
搞到我都想睇多次添。

不過果D技術同理論我想我睇多幾次都唔會記得,如果電影再拍得複雜D我想我會睇到頭痛。但我都想搞清楚邊層係入邊個0既夢,呢樣我唔係好記得。唔知係咪被人入夢果個先可以有潛意識投射0既人出現呢,呀。。。好似又唔係咁樣。哈哈哈我都好亂。

時間方面,係咪好似現實同第一層夢:五分鐘同一個鐘0既關係如此類推呢?我淨係記得他們推算不知到了那一層可以長達50年,我已經哇哇聲。

說...

以我記得, 電影裡面好似冇交待係咩技術.
以我記得, 入夢既次序好似係 :

第一層夢 : share搞麻醉藥果位人兄既夢境.
第二層夢 : share arthur既夢境.
第三層夢 : share 有錢仔既夢境.
第四層夢 : share dom既夢境.

因為有太多細節, 所以要睇多次(或幾次)先知道哂呢. ^^"

beetlejuice 說...

睇多幾次就可能被你發現d plot hole,哈哈。。。

仲有,最尾日本仔變老果度。。。其實係咪dom搵到日本仔之後再入夢,到左第五層呢?

說...

哈哈, 咁又係.

就係日本仔果度搞唔太清楚. 記得o係果幕, 個totem係轉既, 咁個故事邏輯又話如果係轉緊既話, 就代表住係現實, 咁即係話日本仔老左果幕係現實唔係夢境吖, 但一轉眼, 就係飛機上大家都"返唻囉", 所以呢一part係其中一部份我唔係好清楚想睇多次搞清楚佢既地方.

beetlejuice 說...

咦。。。咪先。。。我記得keep住轉係夢境,停低係現實。你記唔記得dom係日本酒店轉個totem,最後停低左,dom就好似鬆一口氣咁,跟住先接到屋企電話。
定係我記錯呢?

說...

又咪先.....最尾果幕話Dom終於返番去自己屋企見番d仔女, 而個totem係枱度轉, 咁應該係意味住係現實啦, 但跟住個totem開始搖擺不定好似想停落黎咁, 呢度係編者刻意做出黎令到觀眾疑惑究竟係咪其實都係發夢呢.
假如我無理解錯最尾呢段編者"玩野"的用意, 咁應該係轉緊先係現實, 係咪呢 ? 定我錯呢 ? ^^"

呢d討論都幾好玩.

beetlejuice 說...

嗯,呢D討論確實好玩。

記得之前dom係同細路女講過(定係arthur同佢講呢唔記得喇)佢個陀螺totem一路轉唔停就係夢境,會停低就係現實。所以我一路睇落去都係咁認為,而且最尾dom係老婆mo既“夾萬”植入個不停轉0既陀螺totem,話比老婆聽果個世界係夢境。

最尾我都覺得係玩野,搞到似是而非,硬係有D野唔對路咁樣,等觀眾自己去理解。

不過我傾向相信成個任務都係夢。尤其睇到細佬女闖入dom夢境裡basement果幕,竟然係跟隨dom步伐,一樣踩到個玻璃杯,我覺得呢個咁清醒0既女仔係dom潛意識投射出黎0既人物。。。

哈哈哈,咁樣討論落去真係好得意。

說...

呢套電影之所以引人入勝, 係因為不同觀眾會對不同細節有唔同既見解, 單就totem轉定唔轉既理解, 我就跟妳不同了. 我一定要睇多次, 樣樣睇真d先得. ^^

我睇我果場既時候留意到一個有趣既情境, 記得離場時我聽到身邊的一些觀眾意論紛紛, 說廣東話既觀眾猛話睇唔明, 唔知講乜, 但講普通話既一d觀眾就不停分析劇情...希望呢個情況只係冰山一角啦, 因為我覺得香港觀眾理解能力應該都唔低既.

beetlejuice 說...

我果場係左邊兩個十幾歲後生仔,成場“樁樁”下,唔知係眼訓定系點;右邊一家三口,完場個老豆同個女講唔好意思。。。

袁健健 說...

據我記得/理解,曉轉應該係夢境喎,所以植入老婆保險庫果PART主角係整郁個圖騰令佢老婆唔相信個世界係真。

至於結局,我覺得主角其實走唔返出黎,
一來個圖騰係轉的,
二來雖然主角整郁個圖騰,
但佢連望都唔望就去抱住仔女,
根本佢自己都甘心留在夢中。

說...

beetlejuice : 哈哈, 個女可能想睇toy story 3, 但老豆就想睇inception, 話比個女聽呢套好好睇架, 點知個女太細睇唔明...^^"

說...

件健 : 唔, 依你咁講我記得又好似係咁...
o拿, 都話要睇多幾次架啦, 家下我越講越亂喇.
要睇咁多次, 都係買碟好d.

beetlejuice 說...

其實我都係比我細佬一言驚醒夢中人(“夢中人”呢個詞今次對我黎講真係中曬喇),好簡單0既物理定律,totem係現實點會一路轉唔停呢?!

DVD真係must buy呀!

說...

beetlejuice : 又係喎 ^^"
我後尾亦都諗番, Dom同個女仔o係現實度講野既時候, 個totem好似係冇轉到既, 所以我係應該搞錯左 -__-"
如果我搞錯左個前提, 咁我需要重新解扣個電影故事了.

聶秀康 說...

應該係無醒到啦!totem都無停到!
btw,戲後與友討論我認為Dom巳走出夢境,因為我subconscious係想佢醒所以覺得totem停左,經友人提醒其實係無停到一直在轉....

很喜歡臨海頹桓敗瓦的場面,個人來說並不需要看3d版。

說...

三耳 : 我也覺得不用看3D版.

這套電影強的地方就是導演刻意混淆視聽, 點樣解扣呢套電影既細節, 好視乎觀眾的潛意識, 這解釋了為何每個人看到的都有點不一樣.
或許從觀眾自己點樣解釋呢套電影, 可以更了解自己呢.